തിരുവചനം മനനം ചെയ്തിടുകിൽ
അമിതാനന്ദമനുഭവിക്കാം
പരകോടി നവരത്ന ഖനിയതിലും
വിലതീരാത്ത തിരുവചനം

1 നാഥന്റെ തിരുമൊഴി കേൾക്കാം-അതിൽ
ജീവന്റെ പുതുവഴി കാണാം
ജീവിത തരു തഴച്ചനുദിനം വളരാൻ
വചനത്തിൽ ആഴത്തിൽ വേരുറയ്ക്കാം;- തിരു..

2 അരിതൻ നിരകളോടെതിർക്കാൻ - ഇതു
ഇരുവായ്ത്തലയുള്ള വാളാം
നശിക്കുന്ന ജനത്തിന് ഭോഷത്തമിവിടെ
വിശ്വസിക്കുന്നവർക്കെന്നും പുതുജീവൻ;- തിരു..

3 ഇരുളിൻ പ്രവൃത്തികളകലും - ഇതു
കരളിൽ മധുരിമ പകരും
തളരുമാത്മാവിനു പുനരുയിരേകും
കളങ്കങ്ങൾ കഴുകുവാൻ തുണയേകും;-  തിരു...

4 വചനം ഒഴുകിടുമവിടെ - പുതു
ചലനം ഏതിലും നൂനം
വഴി കുഴഞ്ഞുഴലുന്ന പഥികർക്കു പാരിൽ
കനകദീപമായ് പ്രഭയേകും;- തിരു…